ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ ಭರ್ಜರಿ ಗೆಲುವು ಸಾಧಿಸಿದ್ದಾರೆ. ಇದರೊಂದಿಗೆ ಎರಡನೇ ಬಾರಿಗೆ ಅಧ್ಯಕ್ಷ ಸ್ಥಾನಕ್ಕೆ ಏರುವ ಅರ್ಹತೆ ಪಡೆದಿದ್ದಾರೆ. ಈ ನಾಲ್ಕು ವರ್ಷದ ಅವಧಿಯಲ್ಲಿ ಅವರು ಅನೇಕ ಸವಾಲುಗಳನ್ನು ಎದುರಿಸಿದ್ದಾರೆ. ಚುನಾವಣಾ ಅಖಾಡಕ್ಕೆ ಇಳಿದಾಗ ನಡೆದ ಹತ್ಯೆ ಪ್ರಯತ್ನ ಕೂಡ ಎದುರಿಸುವಂತಾಗಿತ್ತು. ಟ್ರಂಪ್ ಜೀವಕ್ಕೆ ಅಪಾಯ ಎದುರಾಗಲಿದೆ ಎಂದು ಬಾಬಾ ವಂಗಾ ನುಡಿದಿದ್ದ ಭವಿಷ್ಯ ನಿಜವಾಗಿದೆ.
ಅನೇಕ ಊಹೆಗಳನ್ನು ತಲೆಕೆಳಗಾಗಿಸಿ ಡೊನಾಲ್ಡ್ ಟ್ರಂಪ್ ಅವರು ಅಮೆರಿಕದ 47ನೇ ಅಧ್ಯಕ್ಷರಾಗಿ ಪುನರಾಗಮನ ಮಾಡಿದ್ದಾರೆ. 2020ರ ಚುನಾವಣೆಯಲ್ಲಿನ ಸೋಲಿನ ಬಳಿಕ ಅವರು ಮತ್ತೆ ಅಧ್ಯಕ್ಷರಾಗಿ ಎರಡನೇ ಅವಧಿ ಪೂರ್ಣಗೊಳಿಸುವ ಶಪಥ ಮಾಡಿದ್ದರು. ಆದರೆ ಅವರ ಹಾದಿ ಅಷ್ಟು ಸುಗಮವಾಗಿರಲಿಲ್ಲ. ಹಾಲಿ ಅಧ್ಯಕ್ಷ ಜೋ ಬೈಡನ್ ದುರ್ಬಲರಂತೆ ಕಂಡಿದ್ದರೂ, ಬಳಿಕ ಅವರು ಕಣದಿಂದ ಹಿಂದೆ ಸರಿದು ಕಮಲಾ ಹ್ಯಾರಿಸ್ ಅಖಾಡಕ್ಕೆ ಇಳಿದ ಬಳಿಕ ಚಿತ್ರಣ ಸಂಪೂರ್ಣ ಬದಲಾಗಿತ್ತು.
ಟ್ರಂಪ್ ಅವರ ಗೆಲುವು ಅಮೆರಿಕದ ಒಳಗಿನ ಅವರ ಪ್ರಭಾವಳಿ ಹೆಚ್ಚಿಸಿದ್ದಲ್ಲದೆ, ಜಾಗತಿಕ ಮಟ್ಟದಲ್ಲಿ ಅವರ ವರ್ಚಸ್ಸು ಕೂಡ ವೃದ್ಧಿಯಾಗಿದೆ. ತಮ್ಮ ಮೇಲೆ ನಡೆದ ಎರಡು ಹತ್ಯೆ ಪ್ರಯತ್ನಗಳಿಂದ ಬಚಾವಾದ ಅವರಿಗೆ, ಇವು ಮತದಾರರ ಅನುಕಂಪ ಗಳಿಸಲು ನೆರವಾಗಿದ್ದನ್ನೂ ಅಲ್ಲಗಳೆಯುವಂತಿಲ್ಲ. ಡೊನಾಲ್ಡ್ ಟ್ರಂಪ್ ಜೀವಕ್ಕೆ ಅಪಾಯವಿದೆ ಎಂದು ಬಾಬಾ ವಂಗಾ ನುಡಿದಿದ್ದ ಭವಿಷ್ಯ ಈಗ ಮುನ್ನೆಲೆಗೆ ಬಂದಿದೆ.
ಬಲ್ಗೇರಿಯಾದ ಅತೀಂದ್ರಿಯ ಶಕ್ತಿಯುಳ್ಳ ಭವಿಷ್ಯಕಾರ್ತಿ, ‘ಬಲ್ಕಾನ್ಸ್ನ ನಾಸ್ಟ್ರಾಡಾಮಸ್’ ಎಂದೇ ಹೆಸರಾದ ಬಾಬಾ ವಂಗಾ, ಅಂಧೆಯಾಗಿದ್ದರೂ ಮುಂದಿನ ದಿನಗಳಲ್ಲಿ ನಡೆಯುವ ಮಹತ್ವದ ಘಟನೆಗಳನ್ನು ತನ್ನ ಒಳಗಣ್ಣಿನಿಂದ ನೋಡುವ ಶಕ್ತಿ ಹೊಂದಿದ್ದರು ಎಂದು ನಂಬಲಾಗಿದೆ. ಎರಡನೇ ಮಹಾಯುದ್ಧ, ಚೆರ್ನೋಬಿಲ್ ಅನಾಹುತ, ಸೋವಿಯತ್ ಒಕ್ಕೂಟದ ಪತನದಂತಹ ಪ್ರಮುಖ ಘಟನೆಗಳ ಬಗ್ಗೆ ಆಕೆ ಮೊದಲೇ ಭವಿಷ್ ನುಡಿದಿದ್ದರು. ಅದೇ ರೀತಿ ಇಬ್ಬರು ಜಾಗತಿಕ ನಾಯಕರಾದ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹಾಗೂ ಡೊನಾಲ್ಡ್ ಟ್ರಂಪ್ ಅವರ ಜೀವಕ್ಕೆ ಇರುವ ಅಪಾಯದ ಕುರಿತು ಸಹ ಅಂದಾಜಿಸಿದ್ದರು. ಅದರಲ್ಲಿಯೂ ಡೊನಾಲ್ಡ್ ಟ್ರಂಪ್ ಜೀವಕ್ಕೆ ಆಪತ್ತು ಇರುವ ಬಗ್ಗೆ ಆಕೆ ನೀಡಿದ್ದ ಸೂಚನೆ ನಿಖರವಾಗಿರುವಂತೆ ಕಂಡುಬಂದಿದೆ.
ಪೆನ್ಸಿಲ್ವೇನಿಯಾದ ಬಟ್ಲೆರ್ನಲ್ಲಿ ಜುಲೈ 13ರಂದು ಡೊನಾಲ್ಡ್ ಟ್ರಂಪ್ ಅವರ ಹತ್ಯೆ ಪ್ರಯತ್ನ ನಡೆದಿತ್ತು. 20 ವರ್ಷದ ವ್ಯಕ್ತಿಯೊಬ್ಬ ಅವರ ಮೇಲೆ ಗುಂಡಿನ ದಾಳಿ ನಡೆಸಿದ್ದ. ಚುನಾವಣಾ ಪ್ರಚಾರ ನಡೆಸುತ್ತಿದ್ದ ಟ್ರಂಪ್ ಅವರ ಕಿವಿಯನ್ನು ಗುಂಡು ಹಾದು ಹೋಗಿತ್ತು. ಗುಂಡು ತಗುಲಿ ಕಿವಿಯಿಂದ ನೆತ್ತರು ಹರಿದಿತ್ತು. ಕೂಡಲೇ ಸೀಕ್ರೆಟ್ ಸರ್ವೀಸ್ ಏಜೆಂಟ್ಗಳು ಟ್ರಂಪ್ ಅವರನ್ನು ಸುತ್ತುಗಟ್ಟಿ, ವೇದಿಕೆಯಿಂದ ಹೊರಗೆ ಕರೆದುಕೊಂಡು ಹೋಗಿದ್ದರು. ಬಳಿಕ ದಾಳಿಕೋರನನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿತ್ತು.
ಡೊನಾಲ್ಡ್ ಟ್ರಂಪ್ ಅವರಿಗೆ ನಿಗೂಢ ಕಾಯಿಲೆ ಬರಲಿದೆ ಎಂದೂ ಬಾಬಾ ವಂಗಾ ಭವಿಷ್ಯ ನುಡಿದಿದ್ದರು. ಅವರಿಗೆ ಬ್ರೈನ್ ಟ್ಯೂಮರ್ ಉಂಟಾಗಲಿದ್ದು, ಕಿವುಡುತನ ಬರಲಿದೆ ಎಂಬುದಾಗಿ ಕೂಡ ಹೇಳಿದ್ದರು. 78 ವರ್ಷ ವಯಸ್ಸಿನ ಟ್ರಂಪ್ ಅವರಲ್ಲಿ ಪ್ರಸ್ತುತ ಯಾವುದೇ ಇಂತಹ ಅನಾರೋಗ್ಯ ಸಮಸ್ಯೆ ಕಂಡುಬಂದಿಲ್ಲ. ಆದರೆ ಇತ್ತೀಚಿನ ಹತ್ಯೆ ಪ್ರಯತ್ನ ಬಾಬಾ ವಂಗಾಳ ಭವಿಷ್ಯಕ್ಕೆ ಹತ್ತಿರವಾಗಿದೆ.
ಯಾರಿದು ಬಾಬಾ ವಂಗಾ?
1911ರಲ್ಲಿ ಜನಿಸಿದ್ದ ವಂಜೆಲಿಯಾ ಪಾಂಡೆವಾ ಗುಶ್ತೆರೊವಾ, ಬಾಬಾ ವಂಗಾ ಎಂಬ ಹೆಸರಿನಿಂದ ಪ್ರಸಿದ್ಧರಾಗಿದ್ದಾರೆ. 12 ನೇ ವಯಸ್ಸಿನಲ್ಲಿದ್ದಾಗ ಬಿರುಗಾಳಿಯೊಂದು ಆಕೆಯನ್ನು ಎತ್ತಿಕೊಂಡು ಹೋಗಿ ದೂರದ ಹೊಲದಲ್ಲಿ ಬೀಳಿಸಿತ್ತು. ಆಗ ಆಕೆ ಎರಡೂ ಕಣ್ಣುಗಳನ್ನು ಕಳೆದುಕೊಂಡಿದ್ದರು ಎನ್ನಲಾಗಿದೆ. ಬಾಬಾ ವಂಗಾ ಅವರ ಭವಿಷ್ಯಗಳು ಎಲ್ಲವೂ ನಿಖರವಾಗಿಲ್ಲ. 2016ಕ್ಕೂ ಮುನ್ನ ಯುರೋಪ್ ಅಂತ್ಯವಾಗುತ್ತದೆ, 2010- 14ರ ನಡುವೆ ಅಣು ಯುದ್ಧ ನಡೆಯುತ್ತದೆ ಎಂಬ ಆಕೆಯ ಹೇಳಿಕೆಗಳು ನಿಜವಾಗಿಲ್ಲ.
