ನಾಸಾದ ಗಗನಯಾತ್ರಿ ಸುನೀತಾ ವಿಲಿಯಮ್ಸ್ ಅವರು ಕಳೆದ ಹಲವು ತಿಂಗಳುಗಳಿಂದ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿಯೇ ಉಳಿದುಕೊಂಡಿದ್ದಾರೆ. ಗಗನಯಾನಕ್ಕೆ ಹೋಗಿದ್ದ ಸುನೀತಾ ವಿಲಿಯಮ್ಸ್ ಕೆಲವು ತಾಂತ್ರಿಕ ಕಾರಣಗಳಿಂದಾಗಿ ಮರಳಿ ಭೂಮಿಗೆ ಬರಲಾಗಿಲ್ಲ. ಫೆಬ್ರವರಿ 2025ರವರೆಗೆ ಬಾಹ್ಯಾಕಾಶದಿಂದ ಸುನೀತ ವಿಲಿಯಮ್ಸ್ ವಾಪಸ್ ಬರಲಿದ್ದಾರೆ. ಜೂನ್‌ 5 ರಂದು ಭೂಮಿಯಿಂದ ತೆರಳಿದ ಸುನೀತಾ ವಿಲಿಯಮ್ಸ್ ಇನ್ನೂ ಕೂಡ ಬಾಹ್ಯಾಕಾಶ ನಿಲ್ದಾಣದಲ್ಲಿಯೇ ಇದ್ದಾರೆ.
ಸದ್ಯ ಸುನೀತಾ ವಿಲಿಯಮ್ಸ್ ಅವರು ತಮ್ಮ ಎಲ್ಲ ಖುಶಿಯ ಕ್ಷಣಗಳನ್ನು, ಪರಿಸ್ಥಿತಿಯನ್ನು ಫೋಟೋಗಳ ಮೂಲಕ ನಾಸಾಗೆ ಕಳುಹಿಸಿದ್ದಾರೆ. ದೀಪಾವಳಿಯ ಸಮಯದಲ್ಲಿ ಸ್ಪೇಸ್ ಸ್ಟೇಷನ್‌‌ನಲ್ಲಿ ತಾವು ದೀಪಾವಳಿಯನ್ನು ಆಚರಿಸಿ ಅದೆ ಫೋಟೋಗಳನ್ನು ನಾಸಾಗೆ ಕಳುಹಿಸಿಕೊಟ್ಟಿದ್ದರು.
ಸದ್ಯ ಇಡೀ ವಿಶ್ವವೇ ಕ್ರಿಸ್ಮಸ್ ಸಂಭ್ರಮಾಚರಣೆಯಲ್ಲಿದ್ದು, ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿಯೇ ಸುನೀತಾ ವಿಲಿಯಮ್ಸ್ ಕೂಡ ಕ್ರಿಸ್ಮಸ್ ಆಚರಣೆಯನ್ನು ಮಾಡಿದ್ದಾರೆ. ಮಂಗಳವಾರ ಅಂದ್ರೆ ಇಂದು ನಾಸಾದ ಜಾನ್ಸನ್ ಸ್ಪೇಸ್ ಸೆಂಟರ್ ಕೆಲವು ಫೋಟೋಗಳನ್ನು ತನ್ನ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದೆ. ಈ ಫೋಟೋದಲ್ಲಿ ಸುನೀತಾ ವಿಲಿಯಮ್ಸ್ ಮತ್ತೊಬ್ಬ ಗಗನಯಾತ್ರಿ ಡಾನ್ ಪೆಟ್ಟಿಟ್ ಜೊತೆ ಸಂತಾ ಕ್ಯಾಪ್ ಹಾಕಿಕೊಂಡು ಸಂಭ್ರಮದಿಂದ ತೆಗೆದುಕೊಂಡ ಫೋಟೋವನ್ನು ನಾಸಾ ಹಂಚಿಕೊಂಡಿದೆ.
ಅನದರ್ ಡೇ, ಅನದರ್ ಸ್ಲೇ ಎಂದು ಅಡಿಬರಹದೊಂದಿಗೆ ಫೋಟೋ ಹಂಚಿಕೊಂಡಿರುವ ನಾಸಾದ ಜಾನ್ಸನ್ ಸ್ಪೇಸ್ ಸೆಂಟರ್ ಡಾನ್ ಪೆಟ್ಟಿಟ್ ಹಾಗೂ ಸುನೀತಾ ವಿಲಿಯಮ್ಸ್ ಫನ್ ಹಾಲಿಡೇಗೆ ಪೋಸ್ ಕೊಟ್ಟಿದ್ದಾರೆ. ಈ ಒಂದು ಚಿತ್ರ ಸ್ಪೇಸ್ ಸ್ಟೇಷನ್ನಲ್ಲಿರುರುವ ಕೊಲಂಬಸ್ ಲ್ಯಾಬರೋಟರಿ ಮಾಡ್ಯೂಲ್ನ ಹ್ಯಾಮ್ ರೇಡಿಯೋದಲ್ಲಿ ಮಾತನಾಡುವಾಗ ತೆಗೆದುಕೊಂಡಿದ್ದು ಎಂದು ಹೇಳಿದೆ.
ಇಬ್ಬರು ಗಗನಯಾತ್ರಿಗಳು ಕ್ರಿಸ್ಮಸ್ ಆಚರಣೆಗೆ ವಿಶೇಷ ಅಡುಗೆಯನ್ನು ತಯಾರು ಮಾಡುತ್ತಿದ್ದಾರೆ. ತಮ್ಮ ಕುಟುಂಬದೊಂದಿಗೆ ವಿಡಿಯೋ ಕಾಲ್ ಮಾಡುವ ಮೂಲಕ ಸಂಪರ್ಕದಲ್ಲಿದ್ದಾರೆ. ರೊಬೊಟಿಕ್ ಕಾರ್ಬೋ ಮಿಷನ್ ಮೂಲಕ ಅವರು ಆಹಾರ ತಯಾರಿಕೆಗೆ ಬೇಕಾದ ತಾಜಾ ಪದಾರ್ಥಗಳ ಡೆಲಿವರಿ ಆಗುತ್ತಿದೆ ಎಂದು ಹೇಳಲಾಗಿದೆ.
ಎಂಟು ದಿನದ ಮಿಷನ್ಗಾಗಿ ಬೋಯಿಂಗ್ ಸ್ಟರ್ಲೈನರ್ ಕ್ಯಾಪ್ಸುಲ್ ಮೂಲಕ ಬಾಹ್ಯಾಕಾಶಕ್ಕೆ ಹಾರಿದ್ದ ಸುನೀತಾ ವಿಲಿಯಮ್ಸ್ ಹಲವು ತಾಂತ್ರಿಕ ತೊಂದರೆಗಳಿಂದ ವಾಪಸ್ ಬರಲು ಆಗಲಿಲ್ಲ. ಹಲವು ತಿಂಗಳುಗಳ ಕಾಲ ನಡೆದ ಅನೇಕ ಬೆಳವಣಿಗೆಗಳ ಬಳಿಕ ನಾಸಾ ಸ್ಪೇಸ್ ಎಕ್ಸ್ ಡ್ರಾಗನ್ ಕ್ಯಾಪ್ಸುಲ್ ಮೂಲಕ ಫೆಬ್ರವರಿಯಲ್ಲಿ ಸುನೀತಾ ವಿಲಿಯಮ್ಸ್ ಭೂಮಿಗೆ ವಾಪಸ್ ಬರಲಿದ್ದಾರೆ ಎಂದು ಹೇಳಿದೆ.
