ಉದ್ಯೋಗಿಗಳಿಗೆ ಟಾರ್ಚರ್‌..ಮ್ಯಾನೇಜರ್‌ ವಿರುದ್ಧವೇ ಸ್ಕೆಚ್‌.!

ಆಫೀಸ್‌ ನಲ್ಲಿ ಕಾಟ ತಡಿಯಲಾರದೆ ಮ್ಯಾನೇಜರ್ ಗೆ ಉದ್ಯೋಗಿಗಳೇ ಸ್ಕೆಚ್‌ ಹಾಕಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ಹೌದು, ಮ್ಯಾನೇಜರ್ ಹೇರುತ್ತಿದ್ದ ಕೆಲಸದ ಒತ್ತಡ ತಡೆಯಲಾರದೆ ಹಾಗೂ ಕಿರಿಕಿರಿಯಿಂದ ಬೇಸತ್ತಿದ್ದ ಉದ್ಯೋಗಿಗಳು, ಮ್ಯಾನೇಜರ್ ಬುದ್ದಿ ಕಲಿಸಲು ಗೂಂಡಾಗಳಿಗೆ ಸುಪಾರಿ ನೀಡಿದ್ದಾರೆ. ಗೂಂಡಾಗಳು ಈ ಮ್ಯಾನೇಜರ್‌ಗೆ ಹಾಡಹಗಲೇ  ಕಲ್ಯಾಣ್ ನಗರದ ರಸ್ತೆಯಲ್ಲಿ, ಕಬ್ಬಿಣದ ರಾಡ್‌ನಿಂದ ಥಳಿಸುತ್ತಿರುವ ವಿಡಿಯೋ ಈಗ ವೈರಲ್‌ ಆಗುತ್ತಿದೆ. ಉದ್ಯೋಗ ಸ್ಥಳದಲ್ಲಿ ಸಣ್ಣಪುಟ್ಟ ಮನಸ್ತಾಪ, ಕೆಲಸದ ಒತ್ತಡ, ಮೇಲಾಧಿಕಾರಿಗಳಿಂದ ಕಿರಿಕಿರಿಯೂ ಸರ್ವೇಸಾಮಾನ್ಯ. ಇನ್ನು ಹಲ್ಲೆಗೊಳಗಾದ ಮ್ಯಾನೇಜರ್ರನ್ನ ಸುರೇಶ್ ಎಂದು ಹೇಳಲಾಗುತ್ತಿದೆ. ಸುಮಾರು 1 ವರ್ಷದ ಹಿಂದೆ ಸಂಸ್ಥೆಗೆ ಕೆಲಸಕ್ಕೆಂದು ಸೇರಿದ್ದರು. ಅವರು ಸಂಸ್ಥೆಯ ಇತರ ಇಬ್ಬರು ಉದ್ಯೋಗಿಗಳಾದ ಉಮಾಶಂಕರ್ ಮತ್ತು ವಿನೇಶ್‌ಗೆ ತುಂಬ ಒತ್ತಡ ಹೇರುತ್ತಿದ್ದರಂತೆ. ಎಲ್ಲರ ಮುಂದೆಯೇ ಅವಮಾನ ಮಾಡುತ್ತಿದ್ದರಂತೆ. ಇದರಿಂದ ಕೋಪಗೊಂಡಿದ್ದ, ಈ ಇಬ್ಬರು ಉದ್ಯೋಗಿಗಳು, ಮ್ಯಾನೇಜರ್‌ ವಿರುದ್ಧವೇ ಸಂಚು ರೂಪಿಸಿ, ಹಲ್ಲೆಗೆ ಸುಪಾರಿ ನೀಡಿ ಈಗ ಪೊಲೀಸರ ಅತಿಥಿ ಆಗಿದ್ದಾರೆ. ಮಾರ್ಚ್‌ 31 ರಂದು ನಡೆದ ಘಟನೆಯ ವಿಡಿಯೋ ಈಗ ವೈರಲ್‌ ಆಗುತ್ತಿದೆ.