ಕನ್ನಡ ಧಾರಾವಾಹಿ ‘ಸೀತಾರಾಮ’ ಖ್ಯಾತಿಯ ನಟಿ ವೈಷ್ಣವಿ ಗೌಡ ಅವರು ತಮ್ಮ ಮೊದಲ ಸೀರಿಯಲ್ ‘ದೇವಿ’ ಶೂಟಿಂಗ್ ವೇಳೆ ಸಂಭವಿಸಿದ ರೋಚಕ ಘಟನೆಯನ್ನು ಇತ್ತೀಚೆಗೆ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. 2010ರಲ್ಲಿ ಜೀ ಕನ್ನಡದಲ್ಲಿ ಪ್ರಸಾರವಾದ ‘ದೇವಿ’ ಸೀರಿಯಲ್‌ನ ಶೂಟಿಂಗ್ ಸಂದರ್ಭದಲ್ಲಿ, ವೈಷ್ಣವಿ ಮತ್ತು ತಂಡದವರು ತೆಪ್ಪದ ಮೇಲೆ ಸಾಗುತ್ತಿದ್ದಾಗ ತೆಪ್ಪ ಮಗುಚಿ ಎಲ್ಲರೂ ನೀರಿಗೆ ಬಿದ್ದಿದ್ದರು.
“ನಾವು ತುಂಬಾ ಚಿಕ್ಕವರಿದ್ದೆವು. ತೆಪ್ಪದ ಮೇಲೆ ಶೂಟಿಂಗ್‌ಗೆ ಹೋಗುತ್ತಿದ್ದಾಗ ಒಮ್ಮೆಲೇ ತೆಪ್ಪ ಮಗುಚಿತು. ಎಲ್ಲರೂ ನೀರಿಗೆ ಬಿದ್ದೆವು. ಆದರೆ, ಪುಣ್ಯಕ್ಕೆ ನೀರು ಆಳವಿರಲಿಲ್ಲ. ಶೂಟಿಂಗ್ ಬಿಟ್ಟು ಎಲ್ಲರೂ ನೀರಾಟ ಆಡತೊಡಗಿದೆವು,” ಎಂದು ವೈಷ್ಣವಿ ನಗೆಯಿಂದ ನೆನಪಿಸಿಕೊಂಡಿದ್ದಾರೆ.
ಎಂಗೇಜ್‌ಮೆಂಟ್‌ನ ಸಂಭ್ರಮ
ವೈಷ್ಣವಿ ಗೌಡ ಸದ್ಯ ತಮ್ಮ ವೈಯಕ್ತಿಕ ಜೀವನದಲ್ಲಿ ಹೊಸ ಅಧ್ಯಾಯವನ್ನು ಆರಂಭಿಸಿದ್ದಾರೆ. ಇತ್ತೀಚೆಗೆ ಅವರು ಅನುಕೂಲ್ ಮಿಶ್ರಾ ಎಂಬ ಏರ್‌ಫೋರ್ಸ್ ಅಧಿಕಾರಿಯ ಜೊತೆ ಅದ್ಧೂರಿಯಾಗಿ ಎಂಗೇಜ್‌ಮೆಂಟ್ ಮಾಡಿಕೊಂಡಿದ್ದಾರೆ. ಈ ಸುದ್ದಿಯನ್ನು ಗುಟ್ಟಾಗಿಟ್ಟಿದ್ದ ವೈಷ್ಣವಿ, ಎಂಗೇಜ್‌ಮೆಂಟ್‌ನೊಂದಿಗೆ ಅಭಿಮಾನಿಗಳಿಗೆ ಸರ್‌ಪ್ರೈಸ್ ನೀಡಿದ್ದಾರೆ.
ಅನುಕೂಲ್ ಬೇರೆ ರಾಜ್ಯದವರಾಗಿದ್ದು, ವೈಷ್ಣವಿ ಇತ್ತೀಚೆಗೆ ಬೆಂಗಳೂರಿನ ಏರ್‌ಷೋಗೆ ಭೇಟಿ ನೀಡಿದ್ದು ಅನುಕೂಲ್‌ರಿಂದಲೇ ಸಾಧ್ಯವಾಯಿತು ಎಂದು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. “ಥ್ಯಾಂಕ್ಯು ಎ, ನಿಮ್ಮಿಂದಲೇ ಏರ್‌ಷೋ ನೋಡಲು ಸಾಧ್ಯವಾಯಿತು,” ಎಂದು ಬರೆದಿದ್ದ ವೈಷ್ಣವಿ, ಆಗ ಗುಟ್ಟನ್ನು ರಿವೀಲ್ ಮಾಡಿರಲಿಲ್ಲ. ಈಗ ಭಾವಿ ಪತಿಯನ್ನು ಅಭಿಮಾನಿಗಳಿಗೆ ಪರಿಚಯಿಸಿದ್ದಾರೆ.
ಅಮ್ಮನ ಸಾಧನೆಗೆ ವೈಷ್ಣವಿಯ ಹೆಮ್ಮೆ
ವೈಷ್ಣವಿ ಗೌಡ ಅವರ ತಾಯಿ ಭಾನು ರವಿಕುಮಾರ್ ಕಾನೂನು ಮತ್ತು ಸೈಕಾಲಾಜಿ ಪದವಿಗಳನ್ನು ಪಡೆದ ವಕೀಲೆಯಾಗಿದ್ದಾರೆ. ಇತ್ತೀಚೆಗೆ ವಕೀಲಿಕೆಯನ್ನು ಆರಂಭಿಸಿರುವ ಭಾನು ಅವರ ಸಾಧನೆಯ ಬಗ್ಗೆ ವೈಷ್ಣವಿ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ. ಒಂದು ವಿಡಿಯೋದಲ್ಲಿ, ವೈಷ್ಣವಿ ತಮ್ಮ ಯಾವ ಸೀರಿಯಲ್ ಇಷ್ಟ ಎಂದು ಅಮ್ಮನಿಗೆ ಕೇಳಿದಾಗ, ಭಾನು ಅವರು ‘ದೇವಿ’ ಸೀರಿಯಲ್ ಎಂದು ಉತ್ತರಿಸಿದ್ದಾರೆ. ಈ ಸಂದರ್ಭದಲ್ಲಿ ವೈಷ್ಣವಿ ಶೂಟಿಂಗ್‌ನ ತೆಪ್ಪ ಘಟನೆಯನ್ನು ನೆನಪಿಸಿಕೊಂಡಿದ್ದಾರೆ. ಇದೇ ವಿಡಿಯೋದಲ್ಲಿ ಅಮ್ಮನ ಸ್ಫೂರ್ತಿಯ ಕುರಿತು ಮಾತನಾಡಿದ ವೈಷ್ಣವಿ, ತಾಯಿಯ ಸಾಧನೆಯ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ್ದಾರೆ.
ವೈಷ್ಣವಿ ಅವರ ತಾಯಿ ಭಾನು ರವಿಕುಮಾರ್ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ತಮ್ಮ ಶಿಕ್ಷಣದ ಅನುಭವವನ್ನು ಹಂಚಿಕೊಂಡಿದ್ದಾರೆ. “ಯೌವನದಲ್ಲಿ ಓದಲು ಸಾಧ್ಯವಾಗಲಿಲ್ಲ. ಆದರೆ, ಕುಟುಂಬದವರ ಪ್ರೋತ್ಸಾಹದಿಂದ ಎರಡು ಪದವಿಗಳನ್ನು ಪೂರ್ಣಗೊಳಿಸಿದೆ,” ಎಂದು ಭಾನು ಹೇಳಿದ್ದಾರೆ. ಎಲ್‌ಎಲ್‌ಬಿ ಪದವಿಯನ್ನು ರೆಗ್ಯುಲರ್ ಕಾಲೇಜಿನಲ್ಲಿ ಓದಿದ ಅನುಭವವನ್ನು ವಿವರಿಸಿದ ಅವರು, “ಮೊದಲಿಗೆ ಮಕ್ಕಳ ಜೊತೆ ಓದುವಾಗ ಮುಜುಗರವಾಯಿತು. ಕೆಲವರು ನನ್ನನ್ನು ಲೆಕ್ಚರರ್ ಎಂದು ತಪ್ಪಾಗಿ ಭಾವಿಸಿದರು. ಆದರೆ, ಕೊನೆಗೆ ಎಲ್ಲವೂ ಸರಿಹೋಯಿತು,” ಎಂದಿದ್ದಾರೆ. ಗೃಹಿಣಿಯಾಗಿಯೂ ಸಾಧನೆ ಸಾಧ್ಯ ಎಂದು ತೋರಿಸಿರುವ ಭಾನು ಅವರಿಗೆ ವೈಷ್ಣವಿ ಅವರ ತಂದೆ ಕೂಡ ಶುಭಾಶಯ ಕೋರಿದ್ದಾರೆ.