ಮೈಸೂರು ದಸರಾ ಮಹೋತ್ಸವಕ್ಕಾಗಿ ಗಜಪಡೆಯ ಎರಡನೇ ತಂಡದಲ್ಲಿ 5 ಆನೆಗಳು ಇಂದು ಕಾಡಿನಿಂದ ಮೈಸೂರಿಗೆ ಆಗಮಿಸಲಿವೆ. ಎರಡನೇ ತಂಡದಲ್ಲಿ 3 ಗಂಡು, 2 ಹೆಣ್ಣು ಆನೆಗಳಿವೆ. ಪ್ರಶಾಂತ ಹಾಗೂ ಸುಗ್ರೀವ ಆನೆಗಳನ್ನು ದುಬಾರೆ ಆನೆ ಶಿಬಿರದಿಂದ, ಮಹೇಂದ್ರ ಆನೆಯನ್ನು ಮತ್ತಿಗೋಡು ಆನೆ ಶಿಬಿರದಿಂದ, ದೊಡ್ಡಹರವೆ ಲಕ್ಷ್ಮೀ ಆನೆಯನ್ನು ದೊಡ್ಡಹರವೆ ಆನೆ ಶಿಬಿರದಿಂದ, ಹಿರಣ್ಯಾ ಆನೆಯನ್ನು ರಾಮಪುರ ಆನೆ ಶಿಬಿರದಿಂದ ಲಾರಿಗಳಲ್ಲಿ ಮೈಸೂರಿಗೆ ಕರೆ ತರಲಾಗುತ್ತಿದೆ. ಮೊದಲ ತಂಡದಲ್ಲಿ ಅಂಬಾರಿ ಆನೆ ಅಭಿಮನ್ಯು ಸೇರಿ 9 ಆನೆಗಳು ಆಗಸ್ಟ್‌ 23ರಂದು ಮೈಸೂರು ಅರಮನೆ ಪ್ರವೇಶಿಸಿದ್ದು, ಪ್ರತಿದಿನ ತಾಲೀಮು ನಡೆಸುತ್ತಿವೆ. ಈಗ 2ನೇ ತಂಡದಲ್ಲಿ 5 ಆನೆಗಳು ಆಗಮಿಸಿ ಮೊದಲ ತಂಡದೊಂದಿಗೆ ಸೇರಿಕೊಳ್ಳಲಿವೆ.
