ಮೈಸೂರು ಮೂಲದ ಈ ಸ್ಫುರದ್ರೂಪಿ ನಾಯಕ ನಟನ ಹೆಸರು ವಿರಾಟ್. ಹೆಸರಲ್ಲೇ ಪಾಸಿಟಿವ್ ವೈಬ್‌ ಇದೆ. ಚೊಚ್ಚಲ ಚಿತ್ರದಲ್ಲೇ ಯೂತ್ ದಿಲ್ ದೋಚಿದ ವಿರಾಟ್, ಕಿಸ್ ಮೂಲಕ ಅದೆಷ್ಟೋ ಮಂದಿ ಹುಡ್ಗಿಯರ ಡ್ರೀಮ್ ಬಾಯ್ ಆಗಿಬಿಟ್ಟರು. ಶ್ರೀಲೀಲಾ ಅಂತಹ ಕ್ಯೂಟ್ ಕ್ವೀನ್ ಜೊತೆ ವಿರಾಟ್ ರೊಮ್ಯಾನ್ಸ್ ಮಾಡೋ ಮೂಲಕ ಸ್ಯಾಂಡಲ್ ವುಡ್ ನ ಭವಿಷ್ಯದ ಸ್ಟಾರ್ ಆಗೋ ಲಕ್ಷಣ ತೋರಿದ್ದರು. ಆದ್ರೆ ಅದು ಆತನ ತಪ್ಪೋ, ಅಥವಾ ಬೇರಾರ ತಪ್ಪುಗಳಿಂದಲೋ ಮೊದಲ ಸಿನಿಮಾ ಆದ ಐದು ವರ್ಷಗಳಾದ್ರೂ ವಿರಾಟ್ ಎರಡನೇ ಸಿನಿಮಾ ಬರಲಿಲ್ಲ. ಇದೀಗ ದಿನಕರ್ ತೂಗುದೀಪ ನಿರ್ದೇಶನದಲ್ಲಿ ರಾಯಲ್ ಸಿನಿಮಾ ಇತ್ತೀಚೆಗೆ ರಿಲೀಸ್ ಆಯ್ತು.
ಸಿನಿಮಾ ಹಿಟ್ ಆಯ್ತಾ..? ಫ್ಲಾಪ್ ಆಯ್ತಾ..? ನೋಡಿದವರು ಏನಂದ್ರು..? ನಿರ್ಮಾಪಕರಿಗೆ ಎಷ್ಟು ದುಡ್ಡು ಬಂತು ಅನ್ನೋದೆಲ್ಲಾ ಸೆಕೆಂಡರಿ. ಆದ್ರೆ ನಟ ವಿರಾಟ್ ಈ ಚಿತ್ರಕ್ಕಾಗಿ ತನ್ನ ತನು ಮನ ಧನವನ್ನು ಅರ್ಪಿಸಿಕೊಂಡ ಪರಿ ನಿಜಕ್ಕೂ ಗ್ರೇಟ್ ಅನಿಸುತ್ತೆ. ಹೌದು.. ನೆಕ್ಸ್ಟ್ ಲೆವೆಲ್ ಪರ್ಫಾರ್ಮರ್ ಅನಿಸಿಕೊಳ್ಳೋಕೆ ಅದಕ್ಕೂ ಮೀರಿದ ಹಾರ್ಡ್ ವರ್ಕ್, ಡೆಡಿಕೇಷನ್ ಇರಬೇಕಾಗುತ್ತೆ. ಅದಕ್ಕೆ ಬೆಸ್ಟ್ ಎಕ್ಸಾಂಪಲ್ ಅಂದ್ರೆ ವಿರಾಟ್. ಟಾಂಗ್ ಟಾಂಗ್ ಹಾಡಿನಲ್ಲಿ ನಡೆದ ಇನ್ಸಿಡೆಂಟ್ ಒಂದನ್ನ ನಿಮಗೆ ಹೇಳ್ತೀವಿ. ಇದನ್ನ ಕೇಳಿದ್ರೆ ನೀವೇ ಬೆಚ್ಚಿ ಬೀಳ್ತೀರಾ.
ನೆಲಮಂಗಲದ ಬಳಿ ಇರೋ ಮೋಹನ್ ಬಿ ಕೆರೆ ಸ್ಟುಡಿಯೋದಲ್ಲಿ ಸುಮಾರು ಒಂದೂಕಾಲು ಕೋಟಿ ಬೃಹತ್ ಮೊತ್ತದಲ್ಲಿ ಕಲರ್ ಫುಲ್ ಸೆಟ್ ನಿರ್ಮಿಸಿ, ರಾಯಲ್ ಚಿತ್ರದ ಶೂಟಿಂಗ್ ಮಾಡಲಾಗುತ್ತಿತ್ತು. ಹೈದ್ರಾಬಾದ್ ನಿಂದ ಅಪ್ಪು ಅವರ ಫೇವರಿಟ್ ಡ್ಯಾನ್ಸ್ ಕೊರಿಯೋಗ್ರಾಫರ್ ಜಾನಿ ಮಾಸ್ಟರ್ ಕೂಡ ಬಂದಿದ್ದರು. ಮುಂಬೈನಿಂದ ನೂರಾರು ಮಂದಿ ಡ್ಯಾನ್ಸರ್ಸ್ ನ ಕರೆಸಿದ್ರು ನಿರ್ಮಾಪಕ ಜಯಣ್ಣ. ಒಂದು ಟಫ್ ಆ್ಯಂಡ್ ರಿಸ್ಕಿ ಸ್ಟೆಪ್ ಹಾಕಲು ಹೋದಂತಹ ನಾಯಕನಟ ವಿರಾಟ್ ಗೆ ಬಲಗಾಲಿನ ತೊಡೆ ಭಾಗದಲ್ಲಿ ಬೋನ್ ಫ್ರಾಕ್ಟರ್ ಆಗುತ್ತೆ. ಬರೋಬ್ಬರಿ 8ರಿಂದ 11 ಇಂಚಿನಷ್ಟು ದೊಡ್ಡದಾಗಿ ಹ್ಯಾಮ್ ಸ್ಟ್ರಿಂಗ್ ಟಯರ್ ಆಗುತ್ತೆ. ಅದ್ರಿಂದ ಹೊರ ಬರೋಕೆ ಆತನಿಗೆ ಕನಿಷ್ಟ ಐದಾರು ತಿಂಗಳಾದ್ರೂ ಬೇಕಾಗುತ್ತೆ. ನಿರ್ಮಾಪಕರು ಕೂಡ ಶೂಟಿಂಗ್ ನಿಲ್ಲಿಸೋಣ ಅಂತಾರೆ. ಆದ್ರೆ ಜಾನಿ ಮಾಸ್ಟರ್ ಡೇಟ್ಸ್, 1.25 ಕೋಟಿ ಸೆಟ್, ನೂರಾರು ಮಂದಿ ಮುಂಬೈ ಡ್ಯಾನ್ಸರ್ಸ್ ಗಳನ್ನ ಮತ್ತೆ ಕರೆಸಿ ಮಾಡಿಸೋದು ಕಷ್ಟ ಅಂತ ಹೇಳಿ, ಆ ನೋವಲ್ಲೇ ಶೂಟಿಂಗ್ ಮಾಡ್ತಾರೆ ವಿರಾಟ್.
ಅಂದಹಾಗೆ ಅಂತಹ ಟಫ್ ಸಿಚ್ಯುವೇಷನ್ ನಲ್ಲಿ ವಿರಾಟ್ ಗೆ ಬಹಳ ಸಹಾಯಕಾರಿ ಆಗಿದ್ದು ನಿರ್ಮಾಪಕ ಜಯಣ್ಣ ಹಾಗೂ ಅವರು ಕರೆಸಿ ಟ್ರೀಟ್ಮೆಂಟ್ ಕೊಡಿಸಿದ ಡಾಕ್ಟರ್ ವಿನೋದ್ ಜೈನ್. ಹೌದು.. ವಿರಾಟ್ ಕೊಹ್ಲಿ ಅಂತಹ ಟಾಪ್ ಅಥ್ಲೀಟ್ಸ್ ಗೆ ಚಿಕಿತ್ಸೆ ನೀಡ್ತಿದ್ದ ಡಾ ವಿನೋದ್ ಜೈನ್ ನಟ ವಿರಾಟ್ ಗೆ ಸೆಟ್ ನಲ್ಲೇ ಸುಮಾರು 3 ದಿನಗಳ ಕಾಲ ಟ್ರೀಟ್ಮೆಂಟ್ ನೀಡ್ತಾರೆ. ಒಂದೊಂದು ಶಾಟ್ ಆದ ಬಳಿಕವೂ ಆತನಿಗೆ ಚಿಕಿತ್ಸೆ ನೀಡಲಾಗ್ತಿರುತ್ತೆ. ಇಂತಹ ಡೆಡಿಕೇಷನ್ ಬೇರೆ ಯಾರಿಂದ ನಿರೀಕ್ಷಿಸಲು ಸಾಧ್ಯ ಅಲ್ಲವೇ..?
ರಾಕಿ ಸಿನಿಮಾದ ಹಾಡೊಂದಕ್ಕಾಗಿ ನಟ ರಾಕಿಂಗ್ ಸ್ಟಾರ್ ಯಶ್ ಕೂಡ ಇದೇ ರೀತಿ ಕಾಲು ಮುರಿದುಕೊಂಡಿದ್ದರಂತೆ. ಅಂದು ಅವರಲ್ಲೂ ಏನಾದ್ರು ಸಾಧಿಸಬೇಕು ಅನ್ನೋ ಕಿಚ್ಚಿತ್ತು. ಅದೇ ಕಿಚ್ಚು ಇಂದು ನ್ಯಾಷನಲ್ ಸ್ಟಾರ್ ಪಟ್ಟಕ್ಕೆ ತಂದು ಕೂರಿಸಿದೆ. ಯಶ್ ಅವ್ರ ಹಾರ್ಡ್ ವರ್ಕ್, ಡೆಡಿಕೇಷನ್ ನಂತೆ ವಿರಾಟ್ ಕೂಡ ಅವರ ಮಾರ್ಗ ಅನುಸರಿಸುತ್ತಿರೋದು ನೋಡಿದ್ರೆ ಭವಿಷ್ಯದ ಸ್ಟಾರ್ ಅಗೋದ್ರಲ್ಲಿ ಯಾವುದೇ ಅನುಮಾನವಿಲ್ಲ.
ಸದ್ಯ ರಾಯಲ್ ಚಿತ್ರದ ಬಳಿಕ ಯಶ್ ಅಂತಹ ಸ್ಟಾರ್ ಗೆ ದೊಡ್ಡ ವೇದಿಕೆ ಮಾಡಿಕೊಟ್ಟಂತಹ ಜಯಣ್ಣ ಫಿಲಂಸ್ ಬ್ಯಾನರ್ ಮತ್ತೊಂದು ಸಿನಿಮಾ ಮಾಡಲು ಸಜ್ಜಾಗಿದೆ. ಸುಕ್ಕಾ ಸೂರಿ ನಿರ್ದೇಶನದಲ್ಲಿ ಆ ಚಿತ್ರ ಕಿಕ್ ಸ್ಟಾರ್ಟ್ ಆಗಲಿದ್ದು, ಸೂರಿ ಅವ್ರ ಸಿನಿದುನಿಯಾಗೆ ಈ ಚಿತ್ರ ಹೊಸ ಆಯಾಮ ಕೊಡಲಿದೆ ಎನ್ನಲಾಗ್ತಿದೆ. ಒಟ್ಟಾರೆ ಸೂರಿ- ವಿರಾಟ್- ಜಯಣ್ಣ ಕ್ರೇಜಿ ಕಾಂಬೋನಲ್ಲಿ ಸದ್ಯದಲ್ಲೇ ಹೊಚ್ಚ ಹೊಸ ಸಿನಿಮಾ ಅನೌನ್ಸ್ ಆಗಲಿದೆ. ಸದಾ ಲವಲವಿಕೆಯಿಂದ ಇರೋ ವಿರಾಟ್, ಮತ್ತಷ್ಟು ಲೈವ್ಲಿಯಾಗಿ ಪ್ರೇಕ್ಷಕರನ್ನ ಡ್ಯಾನ್ಸ್ ಮೂಲಕ ರಂಜಿಸೋದು ಪಕ್ಕಾ ಅಂತಿವೆ ಗಾಂಧಿನಗರದ ಮೂಲಗಳು.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್
ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
ಗ್ಯಾರಂಟಿ ನ್ಯೂಸ್ ವಾಟ್ಸಾಪ್ ಚಾನೆಲ್ ಫಾಲೋ ಮಾಡಿ: https://whatsapp.com/channel/0029VafyCqRFnSzHn1JWKi1B
ಜೊತೆಯಲ್ಲೇ ಗ್ಯಾರಂಟಿ ನ್ಯೂಸ್ ಸಮುದಾಯವನ್ನು ಸೇರಲು ಈ ಲಿಂಕ್ ಕ್ಲಿಕ್ಕಿಸಿ: https://chat.whatsapp.com/HWayJDSBf9aI06q6jplPgc
