ಚಂದನವನದ ಪ್ರತಿಭಾವಂತ ನಟಿ ರುಕ್ಮಿಣಿ ತಮ್ಮ ನಟನೆಯ ಮೂಲಕ ಚಂದನವನದಲ್ಲಿ ಮಾತ್ರವಲ್ಲ, ದಕ್ಷಿಣ ಭಾರತದ ಚಿತ್ರರಂಗದಲ್ಲೂ ಗಮನ ಸೆಳೆಯುತ್ತಿರುವ ಖ್ಯಾತ ನಟಿಯರಲ್ಲಿ ಒಬ್ಬರಾಗಿದ್ದಾರೆ.ಅವರ ಮೊದಲ ತಮಿಳು ಚಿತ್ರ ‘ACE’ನ ವಿಶೇಷ ಗ್ಲಿಂಪ್ಸ್ ಬಿಡುಗಡೆಗಡೆಯಾಗಿದೆ.
‘ACE’ ಸಿನಿಮಾದಲ್ಲಿ, ರುಕ್ಮಿಣಿ ತಮಿಳು ಚಿತ್ರರಂಗದ ದಿಗ್ಗಜ ನಟ ವಿಜಯ್ ಸೇತುಪತಿಗೆ ಜೋಡಿಯಾಗಿ ಅಭಿನಯಿಸಿದ್ದಾರೆ. ಅರುಮುಗ ಕುಮಾರ್ ನಿರ್ದೇಶನದ ಈ ಚಿತ್ರದಲ್ಲಿ ಅವರು ‘ರುಕ್ಕು’ ಪಾತ್ರದಲ್ಲಿ ಅಭಿನಯಿಸುತ್ತಿದ್ದು, ಮೊದಲ ಲುಕ್ ಕೂಡಾ ದೊಡ್ಡ ಮಟ್ಟದಲ್ಲಿ ಚರ್ಚೆಗೆ ಕಾರಣವಾಗಿದೆ. ವಿಭಿನ್ನ ಕಥಾಹಂದರವನ್ನು ಆಯ್ಕೆ ಮಾಡುವ ಮೂಲಕ ನಿರಂತರ ಹೊಸತನವನ್ನು ಹುಡುಕುತ್ತಾರೆ ರುಕ್ಮಿಣಿ ವಸಂತ್. ‘ಸಪ್ತಸಾಗರದಾಚೆ ಎಲ್ಲೋ’ ಸೈಡ್ ಎ ಮತ್ತು ಸೈಡ್ ಬಿ ಸಿನಿಮಾದಲ್ಲಿ ರಕ್ಷಿತ್ ಶೆಟ್ಟಿಯವರೊಂದಿಗೆ ಅಭಿನಯಿಸಿ ಹೆಚ್ಚು ಹೆಸರು ಪಡೆದ ರುಕ್ಮಿಣಿ, ಇತ್ತೀಚೆಗಷ್ಟೇ ‘ಬಘೀರ’ ಮತ್ತು ‘ಭೈರತಿ ರಣಗಲ್’ ಸಿನಿಮಾಗಳ ಮೂಲಕ ಸದ್ದು ಮಾಡಿದ್ದಾರೆ. ಇದೀಗ ‘ACE’ನ ಮೂಲಕ ಅವರು ತಮಿಳು ಚಿತ್ರರಂಗದಲ್ಲೂ ಸಹಾ ತಮ್ಮ ಚಾಪನ್ನು ಮೂಡಿಸುತ್ತಿದ್ದಾರೆ.
