ತಮ್ಮ ತಂದೆ ಹೆಚ್.ಡಿ.ಕುಮಾರಸ್ವಾಮಿ ಅವರನ್ನು ಏಕವಚನದಲ್ಲಿ ನಿಂದಿಸಿದ್ದ ಡಿಸಿಎಂ ಡಿ.ಕೆ.ಶಿವಕುಮಾರ್ ಅವರಿಗೆ ಜೆಡಿಎಸ್ ಯುವ ಘಟಕದ ಅಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಎಚ್ಚರಿಕೆ ಕೊಟ್ಟಿದ್ದಾರೆ.
ಮೈಸೂರು ಚಲೋ ಪಾದಯಾತ್ರೆಯ ಆರನೇ ದಿನವಾದ ಗುರುವಾರ ಶ್ರೀರಂಗಪಟ್ಟಣದ ಬಹಿರಂಗ ಸಭೆಯಲ್ಲಿ ಮಾತನಾಡಿದ ನಿಖಿಲ್ ಕುಮಾರಸ್ವಾಮಿ, ಡಿಸಿಎಂ ಡಿ.ಕೆ ಶಿವಕುಮಾರ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಡಿ.ಕೆ.ಶಿವಕುಮಾರ್ ಗೆ ತರಾಟೆಗೆ ತೆಗೆದುಕೊಂಡ ನಿಖಿಲ್ ಕುಮಾರಸ್ವಾಮಿ , ನಾವು ಕೂಡ ಒಕ್ಕಲಿಗರೇ, ರೈತರ ಮಕ್ಕಳೇ.. ನಮ್ಮ ಒಕ್ಕಲಿತನ ಪ್ರಶ್ನೆ ಮಾಡಬೇಡಿ ಎಂದು ತಾಕೀತು ಮಾಡಿದರು.
ಮಾತಾಡಬೇಕಾದರೆ ಬಹಳ ಇದೆ. ನಿಮ್ಮ ಬಗ್ಗೆ ನಾನು ಮಾತನಾಡಬಲ್ಲೆ. ಎಚ್ಚರಿಕೆಯಿಂದ ಮಾತಾಡಿ. ನಾನು ಇಷ್ಟು ದಿನಗಳ ಕಾಲ ಸಹಿಸಿಕೊಂಡು ಬಂದಿದ್ದೇನೆ. ಎಂದಾದರೂ ನಿಮ್ಮ ತಂದೆ ಕೆಂಪೇಗೌಡರ ಬಗ್ಗೆ ನೀವು ಮಾತನಾಡುವ ರೀತಿಯಲ್ಲಿ ಕೇವಲವಾಗಿ ನಿಖಿಲ್ ಮಾತಾಡಿದರೆ ನಿಮಗೆ ಏನಾಗಬಹುದು? ಅದನ್ನು ಒಮ್ಮೆ ಯೋಚನೆ ಮಾಡಿ. ನಾನೊಬ್ಬ ಯುವಕ, ನಿಮಗಿಂತ ಕಿರಿಯನಿದ್ದೇನೆ, ಆದರೆ ನೀವು ನಿಮ್ಮ ಸಂಸ್ಕಾರ ಮರೆಯಬೇಡಿ. ರಾಜ್ಯದ ಜನರ ಮುಂದೆ ನಗೆಪಟಾಲಿಗೆ ಈಡಾಗಬೇಡಿ. ವಿಷಯಾಧಾರಿತವಾಗಿ ಚರ್ಚೆ ಮಾಡಿ. ರಾಜಕೀಯವಾಗಿ ಟೀಕೆ ಮಾಡಿ, ಸಂಘರ್ಷ ಮಾಡಿ, ಅದಕ್ಕೂ ನಾವು ಸಿದ್ದರಿದ್ದೇವೆ ಎಂದರು.
ಅಧಿಕಾರ ಶಾಶ್ವತವಲ್ಲ ಶಿವಕುಮಾರಣ್ಣ. ಅಧಿಕಾರ ಇವತ್ತು ಇರುತ್ತೆ, ನಾಳೆ ಹೋಗುತ್ತೆ. ಆದರೆ ನಿಮ್ಮ ನಡೆಗಳು ನಿರಂತರವಾಗಿ ಉಳಿದುಕೊಳ್ಳುತ್ತವೆ. ಅದಕ್ಕಾಗಿ ಮಾತಾಡುವಾಗ ಸ್ವಲ್ಪ ಎಚ್ಚರಿಕೆಯಿಂದ ಮಾತಾಡಿ. ನಿಮ್ಮ ಸೊಕ್ಕಿನ ಮಾತು ನಿಲ್ಲಿಸಿ ಎಂದು ಹೇಳಿದರು.
ನಮ್ಮ ನೀರು ಇವತ್ತು ಡಿಎಂಕೆ ನೀರಾಗಿದೆ
ತೂರಾಡಿಕೊಂಡು ಪಾದಯಾತ್ರೆ ಮಾಡಿದರು ಡಿ.ಕೆ.ಶಿವಕುಮಾರ್ ಅವರು. ಮೇಕೆದಾಟು ಯೋಜನೆ ಮಾಡುತ್ತೇವೆ ಎಂದು ನಮ್ಮ ನೀರು, ನಮ್ಮ ಹಕ್ಕು ಎಂದು ಪಾದಯಾತ್ರೆ ಮಾಡಿದರು. ಎಲ್ಲಣ್ಣ ನಮ್ಮ ನೀರು..? ನಮ್ಮ ನೀರು ಇಲ್ಲ, ನಿಮ್ಮ ನೀರು ಇಲ್ಲ. ಅದು ಡಿಎಂಕೆ ನೀರಾಗಿದೆ ಎಂದು ನಿಖಿಲ್ ಅವರು ಡಿಕೆಶಿಗೆ ಕುಟುಕಿದರು. ಡಿಎಂಕೆ ಪಕ್ಷ ಕಾಂಗ್ರೆಸ್ ನ ಸ್ನೇಹಿತರು, ಕಾಂಗ್ರೆಸ್ ನವರು ಡಿಎಂಕೆಯವರನ್ನು ಒಪ್ಪಿಸಿ ಮೇಕೆದಾಟು ವಿಚಾರವನ್ನು ಬಗೆಹರಿಸಬಹುದಿತ್ತು. ಆದರೆ, ಕಾಂಗ್ರೆಸ್ ನಿಂದ ಅದು ಸಾಧ್ಯವಿಲ್ಲ. ಅವರಿಗೆ ವಿವಾದಗಳನ್ನು ಜೀವಂತವಾಗಿಸಿರಿಕೊಂಡು ಬೇಳೆ ಬೇಯಿಸಿಯಾಕೊಳ್ಳುವುದು ಮಾತ್ರ ಗೊತ್ತು ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದರು.
ದಿನ ಬೆಳಗಾದಾರೆ ಡಿಸಿಎಂಗೆ ಕುಮಾರಸ್ವಾಮಿ ಅವರದೇ ಚಿಂತೆ. ಆದರೆ, ನಾನು ಅವರ ಮಟ್ಟಕ್ಕೆ ಇಳಿಯೋಕೆ ಹೋಗೋದಿಲ್ಲ. ಕರೆಂಟ್ ತೆಗೆಯುವ ಇಂಥ ಕುತಂತ್ರ ರಾಜಕೀಯ ನಾವು ಎಷ್ಟು ನೋಡಿಲ್ಲ. ಶಿವಕುಮಾರಣ್ಣಗೆ ನಾನು ಹೇಳುವುದು ಇಷ್ಟೇ. ಸಹೋದರನ ಒಂದು ಸೋಲಿಂದ ಇಷ್ಟು ಹತಾಶರಾದರೆ ಹೇಗೆ? 2019ರಲ್ಲಿ ದೇವೇಗೌಡರ ಜೊತೆಯಲ್ಲಿ ಇದ್ದುಕೊಂಡು ಕುತ್ತಿಗೆ ಕೊಯ್ಯುವ ಕೆಲಸ ಮಾಡಿದರು. ಇನ್ನೂ ಬಹಳ ಚುನಾವಣೆಗಳಿವೆ ಶಿವಕುಮಾರಣ್ಣ ಎಂದು ಅವರು ಟಾಂಗ್ ನೀಡಿದರು.
