2024 ಕ್ಕೆ ಗುಡ್‌ಬೈ ಹೇಳುವ ಸಮಯ ಬಂದೇ ಬಿಟ್ಟಿದೆ. ಇಂದು 2024ನೇ ಸಾಲಿನ ಕೊನೆಯ ದಿನವಾಗಿದ್ದು ಇನ್ನೇನು ಕೆಲವೇ ಗಂಟೆಗಳಲ್ಲಿ, ನಾಳೆ 2025ರ ಮೊದಲ ದಿನಕ್ಕೆ ನಾವೆಲ್ಲರೂ ಕಾಲಿಡುತ್ತಿದ್ದೇವೆ. ಹಳೆಯ ವರ್ಷಕ್ಕೆ ಟಾಟಾ ಬೈ ಬೈ ಹೇಳಿ ಹೊಸ ಕ್ಯಾಲೆಂಡರ್ ವರ್ಷವನ್ನು ಸ್ವಾಗತಿಸಲುಎಲ್ಲರೂ ಸಜ್ಜಾಗಿದ್ದೇವೆ. ಜನವರಿಯ ಮೊದಲ ದಿನವು ಹೊಸ ಭರವಸೆ, ಹೊಸ ಹುಮ್ಮಸ್ಸು, ಹೊಸ ತೇಜಸ್ಸು, ಹೊಸ ಮನಸ್ಸು, ಹೊಸ ಹುರುಪಿನೊಂದಿಗೆ ಆರಂಭವಾಗುತ್ತದೆ. ಕೆಲವರು ಒಂದಷ್ಟು ಹೊಸ ನಿರ್ಣಯಗಳನ್ನು ತೆಗೆದುಕೊಂಡು ತಮ್ಮ ಜೀವನದಲ್ಲಿ ಅಳವಡಿಸಿ ಕೊಂಡು ಹೊಸ ವರ್ಷವನ್ನು ವೆಲ್‌ ಕಮ್‌ ಮಾಡುತ್ತಾರೆ.
ಈ ಆಚರಣೆಯ ಹಿಂದಿನ ಮಾಹಿತಿ:
ಕ್ರಿಸ್ತ ಪೂರ್ವ 45 ರ ಕಾಲಘಟ್ಟದಲ್ಲಿ ಜನವರಿ 1ರಂದು ಹೊಸ ವರ್ಷ ಆಚರಣೆ ಎಂದು ತೀರ್ಮಾನಿಸಲ್ಪಟ್ಟಿತು. ಈ ಆಚರಣೆಗೂ ಮುನ್ನ ರೋಮನ್‌ ಕ್ಯಾಲೆಂಡರ್‌ನಲ್ಲಿ ಹೊಸ ವರ್ಷ ಮಾರ್ಚ್‌ ತಿಂಗಳಲ್ಲಿ ಆರಂಭವಾಗುತ್ತಿತ್ತು. ಈ ಕ್ಯಾಲೆಂಡರ್ ಪ್ರಕಾರ ವರ್ಷಕ್ಕೆ 355 ದಿನಗಳಷ್ಟೆ ಇದ್ದದ್ದು. ರೋಮನ್‌ ಸರ್ವಾಧಿಕಾರಿ ಜ್ಯೂಲಿಯಸ್‌ ಸೀಸರ್‌ ಅಧಿಕಾರಕ್ಕೆ ಬಂದ ಬಳಿಕ ಕ್ಯಾಲೆಂಡರ್‌ಗೆ ಬದಲಾವಣೆ ತಂದಿದ್ದನು. ಜನವರಿ 1 ರ ಪರಿಕಲ್ಪನೆಯನ್ನು ಜ್ಯೂಲಿಯಸ್‌ ಸೀಸರ್‌ ಸೃಷ್ಟಿ ಮಾಡಿದ್ದನು. ಹೀಗಾಗಿ ರೋಮನ್‌ ದೇವತೆ ಜಾನುಸ್‌ನ ನೆನಪಿಗಾಗಿ ಮೊದಲ ತಿಂಗಳಿಗೆ ಜನವರಿ ಎಂದು ನಾಮಕರಣ ಮಾಡಲಾಗಿದೆ. ಆದರೆ, ಯುರೋಪ್‌ ಸೇರಿದಂತೆ ಬಹುತೇಕ ಪ್ರದೇಶಗಳಲ್ಲಿ ಕ್ರಿ.ಶ. 16ನೇ ಶತಮಾನದ ಮಧ್ಯಭಾಗದ ತನಕವೂ ಜ್ಯೂಲಿಯಸ್‌ ಸೀಸರ್‌ನ ಈ ಪರಿಕಲ್ಪನೆಯ ಕ್ಯಾಲೆಂಡರನ್ನು ಯಾರೂ ಸಹ ಜಾರಿಯಾಗುವಂತೆ ಮಾಡಿರಲಿಲ್ಲ.
ಕ್ರೈಸ್ತ ಧರ್ಮ ವ್ಯಾಪಕವಾಗಿ ಹಬ್ಬುತ್ತಿದ್ದಂತೆ ಹೊಸ ವರ್ಷದ ಆರಂಭವಾಗಿ ಜನವರಿ 1 ಕ್ಕೆ ಪೇಗನ್ ಎಂದೂ ಡಿಸೆಂಬರ್ 25 ಅನ್ನು ಯೇಸುವಿನ ಜನನ ದಿನ ಎಂದೂ ಪರಿಗಣಿಸಲ್ಪಟ್ಟಿತು. ಪೋಪ್ ಗ್ರೆಗೊರಿ ಜ್ಯೂಲಿಯನ್ ಕ್ಯಾಲೆಂಡರನ್ನು ಸುಧಾರಿಸಿದ ನಂತರ ಜನವರಿ 1 ಅನ್ನು ಹೊಸ ವರ್ಷದ ಮೊದಲ ದಿನ ಎಂದು ಕರೆದರು. ಆದರೆ ಈ ಹೊಸ ವರ್ಷ ಆಚರಣೆಯು ಪ್ರಾಚೀನ ಬ್ಯಾಬಿಲೋನ್‌ನಲ್ಲಿ ಕ್ರಿ.ಪೂ. 2,000 ರಲ್ಲಿಯೇ ಹುಟ್ಟಿಕೊಂಡಿತ್ತು. ಈ ಬ್ಯಾಬಿಲೋನಿಯನ್ನರು ಹೊಸ ವರ್ಷವನ್ನು ಅಕಿಟು ಎಂಬ ಹನ್ನೊಂದು ದಿನಗಳ ಆಚರಣೆಯನ್ನಾಗಿ ನಡೆಸುತ್ತಿದ್ದರು. ಹೀಗಾಗಿ ಪ್ರಪಂಚದ ಬಹುತೇಕ ದೇಶಗಳು ಜನವರಿ 1ರಂದು ಹೊಸ ವರ್ಷ ಆಚರಿಸುತ್ತಾರೆ.
ಈ ಆಚರಣೆಯ ಮಹತ್ವ:
ಜನವರಿ 1 ರಂದು ಹೊಸ ಕ್ಯಾಲೆಂಡರ್ ವರ್ಷವನ್ನು ಸ್ವಾಗತಿಸುವ ದಿನವಾಗಿದ್ದು , ಈ ಹಿನ್ನಲೆಯಲ್ಲಿ ಪ್ರಪಂಚದ ಕೆಲವು ದೇಶಗಳಲ್ಲಿ ಹೊಸ ವರ್ಷದ ಆಚರಣೆಯು ಮಹತ್ವದ್ದಾಗಿದೆ. ಅನೇಕ ದೇಶಗಳಲ್ಲಿ ಹೊಸ ವರ್ಷದ ಆಚರಣೆಗಳು ಡಿಸೆಂಬರ್ 31ರಂದೇ ಪ್ರಾರಂಭವಾಗುತ್ತವೆ. ಈ ಡಿಸೆಂಬರ್ 31 ರ ರಾತ್ರಿಯಿಂದಲೇ ಆರಂಭವಾಗುವ ಈ ಆಚರಣೆ ಜನವರಿ 1ರ ಮಧ್ಯರಾತ್ರಿಯವರೆಗೂ ಇರುತ್ತದೆ. ಈ ದಿನದಂದು ಪಟಾಕಿ ಸಿಡಿಸುವುದು, ಎಣ್ಣೆ ಪಾರ್ಟಿ ಮಾಡುತ್ತಾರೆ. ಕೆಲವರಂತೂ ಹೊಸ ವರ್ಷದ ಆರಂಭದೊಂದಿಗೆ ಜೀವನದಲ್ಲಿ ಹಲವಾರು ಮಹತ್ವದ ಬದಲಾವಣೆಗಳನ್ನ ಮಾಡಿಕೊಳ್ಳುತ್ತಾರೆ. ಉತ್ತಮ ನಿರ್ಣಯಗಳನ್ನು ತಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳುತ್ತಾರೆ. ಆದರೆ ಹಿಂದೂ ಧರ್ಮದ ಪ್ರಕಾರ ಯುಗಾದಿ ಹಬ್ಬದ ದಿನದಂದೇ ಹೊಸ ವರ್ಷ ಆಚರಣೆ.
