ಕ್ರಿಕೆಟ್ ಫ್ಯಾನ್ಸ್ಗಳಿಂದ ‘ಗಬ್ಬರ್ ಸಿಂಗ್’ ಎಂದೇ ಖ್ಯಾತಿ ಪಡೆದಿದ್ದ ಶಿಖರ್ ಧವನ್ ನಿನ್ನೆ ನಿವೃತ್ತಿ ಘೋಷಿಸಿದ್ದರು. ದೇಶಿಯ ಮತ್ತು ಅಂತರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಹೇಳಿದ್ದಾರೆ. ವಿಡಿಯೋ ಹಂಚುವ ಮೂಲಕ ನಿವೃತ್ತಿ ಮತ್ತು ತನಗೆ ಪ್ರೋತ್ಸಾಹ ನೀಡಿದವರಿಗೆ ಧನ್ಯವಾದ ಸಮರ್ಪಿಸಿದರು. ಆದರೆ ಇವರ ನಿವೃತ್ತಿ ಬೆನ್ನಲ್ಲೇ ಕ್ರಿಕೆಟ್ ತಾರೆಯರು ಶಿಖರ್ ಧವನ್ಗೆ ಬೆನ್ನು ತಟ್ಟುವ ಮಾತುಗಳನ್ನಾಡಿದ್ದಾರೆ. ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್ ಕೂಡ ಟ್ವೀಟ್ನಲ್ಲಿ ಶಿಖರ್ಗೆ ಧನ್ಯವಾದ ಸಮರ್ಪಿಸಿದ್ದಾರೆ.
ಸಚಿನ್ ತೆಂಡೂಲ್ಕರ್, ‘ಶಿಖರ್ ಧವನ್, ಕ್ರಿಕೆಟ್ ಕ್ಷೇತ್ರವು ಖಂಡಿತವಾಗಿಯೂ ನಿಮ್ಮ ಪ್ರತಿಭೆಯನ್ನು ಕಳೆದುಕೊಳ್ಳುತ್ತಿದೆ. ನಿಮ್ಮ ನಗು, ನಿಮ್ಮ ಶೈಲಿ ಮತ್ತು ಕ್ರೀಡೆ ಮೇಲಿನ ನಿಮ್ಮ ಪ್ರೀತಿ ಯಾವಾಗಲು ಪ್ರಜ್ವಲಿಸುತ್ತದೆ. ನಿಮ್ಮ ಕ್ರಿಕೆಟ್ ವೃತ್ತಿ ಜೀವನದ ಪುಟವು ನೀವು ತಿರುಗಿಸಿದಂತೆ, ನಿಮ್ಮ ಪರಂಪರೆ, ಅಭಿಮಾನಿಗಳು, ತಂಡದ ಸಹ ಆಟಗಾರರ ಹೃದಯದಲ್ಲಿ ಶಾಶ್ವತವಾಗಿ ಉಳಿಯುತ್ತದೆ. ನಿಮ್ಮ ಭವಿಷ್ಯಕ್ಕೆ ಇಳ್ಳೆಯದಾಗಲಿ. ಯಾವಾಗಲೂ ನಗುತ್ತಾ ಇರಿ ಶಿಖರ್’ ಎಂದು ಹೇಳಿದ್ದಾರೆ.
ಸೆಹ್ವಾಗ್ ಕೂಡ ಟ್ವೀಟ್ ಮಾಡಿದ್ದು, ‘ಅಭಿನಂದನೆಗಳು ಶಿಖರ್. ಮೊಹಾಲಿಯಲ್ಲಿ ನೀವು ನನ್ನ ಸ್ಥಾನಕ್ಕೆ ಬಂದಾಗ ನೀವು ಹಿಂತಿರುಗಿ ನೋಡಲಿಲ್ಲ. ಕೆಲವು ಉತ್ತಮ ಪ್ರದರ್ಶನಗಳನ್ನು ನೀಡಿದ್ದೀರಿ. ಮೋಜು ಮಾಡುತ್ತೀರಿ. ನಿಮಗೆ ಒಳಿತಾಗಲಿ’ ಎಂದು ಬರೆದುಕೊಂಡಿದ್ದಾರೆ.
ಗೌತಮ್ ಗಂಭೀರ್ ಕೂಡ ಟ್ವೀಟ್ ಮಾಡಿದ್ದು, ‘ಅದ್ಭುತ ವೃತ್ತಿ ಜೀವನಕ್ಕಾಗಿ ಶಿಖರ್ಗೆ ಅಭಿನಂದನೆಗಳು’ ಎಂದು ಬರೆದುಕೊಂಡಿದ್ದಾರೆ.
