ಇಂದು ನಟಿ ಅನುಷ್ಕಾ ಶೆಟ್ಟಿ ಹುಟ್ಟುಹಬ್ಬ. ಈ ಸಮಯದಲ್ಲಿ ಅವರ ಹೊಚ್ಚ ಹೊಸ ಸಿನಿಮಾ ಘಾಟಿ ಫಸ್ಟ್ ಲುಕ್ ಪೋಸ್ಟರ್ ನ ಚಿತ್ರತಂಡ ಬಿಡುಗಡೆ ಮಾಡಿದೆ. ನಿರ್ದೇಶಕ ಕ್ರಿಶ್ ಜಗರಲಮುಡಿ ಜತೆಗೆ ಅನುಷ್ಕಾ ಅವರ ಎರಡನೇ ಸಿನಿಮಾ ಇದಾಗಿದೆ. ಇದಕ್ಕೂ ಮೊದಲು 2010ರಲ್ಲಿ ವೇದಂ ಸಿನಿಮಾ ಇದೇ ಕಾಂಬೋದಲ್ಲಿ ಬಂದಿತ್ತು. ಇದೀಗ ಘಾಟಿ ಸಿನಿಮಾದ ನಾಯಕಿಯ ಫಸ್ಟ್ ಲುಕ್ ಬಿಡುಗಡೆ ಮಾಡಲಾಗಿದೆ. ಈ ಚಿತ್ರದಲ್ಲಿ ನಾಯಕಿ ರಕ್ತಸಿಕ್ತವಾಗಿ ಚಿಲಂ ಹಿಡಿದು ಆಕ್ರೋಶಭರಿತವಾಗಿ ನೋಡ್ತಿರೋ ಲುಕ್ ಕಂಡು ಅಭಿಮಾನಿಗಳು “ಕ್ವೀನ್”, “ಲೇಡಿ ರೆಬೆಲ್‌‌‌‌ಸ್ಟಾರ್‌” ಎಂದು ಉದ್ಘರಿಸಿದ್ದಾರೆ.
ಇದನ್ನು ಓದಿ: ಯುದ್ಧ ಮಾಡದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್..!
ಯುವಿ ಕ್ರಿಯೇಷನ್ಸ್ ಇಂದು ಅನುಷ್ಕಾ ಶೆಟ್ಟಿಯ ರೌದ್ರ ಮುಖದ ಫೋಟೋನ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದೆ. ಘಾಟಿ ಸಿನಿಮಾದಲ್ಲಿ ನಟಿಯು ಈ ರೂಪದಲ್ಲಿ ಅಬ್ಬರಿಸುವ ಸೂಚನೆಯಿದೆ. ಈ ಫೋಟೋಗೆ “ವಿಕ್ಟಿಮ್, ಕ್ರಿಮಿನಲ್, ಲೆಜೆಂಡ್” ಎಂದು ಕ್ಯಾಪ್ಷನ್ ನೀಡಲಾಗಿದೆ. ಈ ಮೂಲಕ ನಾಯಕಿಯು ಸಂಚಿಗೆ ಬಲಿಯಾದವಳು, ಅಪರಾಧಿಯಾಗುವವಳು, ಅನ್ಯಾಯದ ವಿರುದ್ಧ ಹೋರಾಡಿ ಲೆಜೆಂಡ್ ಆಗಿ ಕಾಣಿಸುವ ಸೂಚನೆ ದೊರಕಿದೆ. ಇದೇ ಸಮಯದಲ್ಲಿ “ದಿ ಕ್ವೀನ್” ಅನುಷ್ಕಾ ಶೆಟ್ಟಿಗೆ ಹ್ಯಾಪಿ ಬರ್ತಡೇ ಅಂತ ಚಿತ್ರತಂಡ ಶುಭಕೋರಿದೆ.ದಶಕಗಳ ಕಾಲ ಟಾಲಿವುಡ್‌‌‌ನ ಸ್ಟಾರ್ ನಟಿಯಾಗಿ ಮೆರೆದ ಅನುಷ್ಕಾ ಶೆಟ್ಟಿ, ‘ಬಾಹುಬಲಿ 2’ ಸಿನಿಮಾದ ಬಳಿಕ ಚಿತ್ರರಂಗದಿಂದ ಅಂತರ ಕಾಯ್ದುಕೊಂಡರು. 2017 ರಲ್ಲಿ ಬಿಡುಗಡೆ ಆದ ‘ಬಾಹುಬಲಿ 2’ ಸಿನಿಮಾದ ಬಳಿಕ ಈವರೆಗೆ ಅನುಷ್ಕಾ ನಟಿಸಿದ್ದು ಕೇವಲ ನಾಲ್ಕು ಸಿನಿಮಾಗಳಲ್ಲಿ. ಅದರಲ್ಲಿ ಒಂದು ಅತಿಥಿ ಪಾತ್ರ. ಉಳಿದ ಚಿತ್ರಗಳು ನಿರೀಕ್ಷಿತ ಮಟ್ಟ ತಲುಪಲೇ ಇಲ್ಲ. ಆದರೆ ಈಗ ಮತ್ತೆ ಚಿತ್ರರಂಗದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳಲು ಸಿದ್ಧವಾದಂತಿದೆ ಸ್ವೀಟಿ ಅನುಷ್ಕಾ ಶೆಟ್ಟಿ. ಈಗ ಒಮ್ಮೆಲೆ ಮೂರು ಸಿನಿಮಾಗಳಲ್ಲಿ ಅನುಷ್ಕಾ ನಟಿಸುತ್ತಿದ್ದು, ಅದರಲ್ಲಿ ಒಂದು ಸಿನಿಮಾದ ಪೋಸ್ಟರ್ ಬಿಡುಗಡೆ ಆಗಿದ್ದು, ಮತ್ತೆ ಹಳೆ ಅನುಷ್ಕಾನ ನೆನಪಿಸುವಂತಿದೆ ಈ ಲುಕ್.
ಇದನ್ನು ಓದಿ:ಸಲ್ಮಾನ್ ನಂತರ ನಟ ಶಾರುಖ್‌ಗೂ ಜೀವ ಬೆದರಿಕೆ ಕರೆ!
ಅನುಷ್ಕಾ ಶೆಟ್ಟಿಯ ಈ ಫಸ್ಟ್ ಲುಕ್ ನೋಡಿ ಅಭಿಮಾನಿಗಳು “ಮಾಸ್ ಓವರ್ ಲೋಡೆಡ್” ಎಂದು ಕೆಲವರು ಕಾಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು “ಸ್ವೀಟಿಯ ಮಾಸ್ ಅವತಾರ” ಎಂದು ಕರೆದಿದ್ದಾರೆ. “ಆಸಕ್ತಿದಾಯಕ” “ರಕ್ತಸಿಕ್ತ” “ಲೇಡಿ ರೆಬೆಲ್ ಸ್ಟಾರ್” “ದಿ ಕ್ವೀನ್” “ಕ್ವೀನ್ ವಾಪಸ್ ಬಂದ್ಲು” “ದೇವಸೇನಾ ಈಸ್ ಬ್ಯಾಕ್” ಎಂದೆಲ್ಲಾ ಕರೆದಿದ್ದಾರೆ. ಇನ್ನು ಕೆಲವರು “ನಿಮ್ಮನ್ನು ಈ ಅವತಾರದಲ್ಲಿ ನಾವು ನಿರೀಕ್ಷಿಸಿರಲಿಲ್ಲ” ಎಂದಿದ್ದಾರೆ.
ಅನುಷ್ಕಾ ಶೆಟ್ಟಿ ‘ಘಾಟಿ’ ಸಿನಿಮಾದ ಜೊತೆಗೆ ಮಲಯಾಳಂನ ‘ಕತನಾರ್’ ಸಿನಿಮಾದಲ್ಲಿಯೂ ನಟಿಸಿದ್ದಾರೆ. ‘ಕತನಾರ್’ ಸಿನಿಮಾದಲ್ಲಿ ಭೂತದ ಪಾತ್ರದಲ್ಲಿ ಅನುಷ್ಕಾ ಶೆಟ್ಟಿ ನಟಿಸಿದ್ದು, ಅಲ್ಲಿಯೂ ಸಹ ಅವರಿಗೆ ಸಖತ್ ಪವರ್ ಫುಲ್ ಪಾತ್ರ ದೊರೆತಿದೆ. ಇದರ ನಡುವೆ ತೆಲುಗಿನ ಮತ್ತೊಂದು ಹಾಸ್ಯ ಸಿನಿಮಾವನ್ನು ಸಹ ಅನುಷ್ಕಾ ಒಪ್ಪಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಮಹಿಳಾ ಕೇಂದ್ರಿತ ಸಿನಿಮಾಗಳ ಮೂಲಕ ತಮ್ಮದೇ ಛಾಪು ಮೂಡಿಸಿರುವ ಅನುಷ್ಕಾ ಶೆಟ್ಟಿ, ಘಾಟಿ ಸಿನಿಮಾದಲ್ಲಿ ಯಾವ ರೀತಿಯ ಮ್ಯಾಜಿಕ್ ಮಾಡುತ್ತಾರೋ ಕಾದು ನೋಡೋಣ.
