ಬಹು ನಿರೀಕ್ಷಿತ ದುಲೀಪ್ ಟ್ರೋಫಿ ಟೂರ್ನಿ ನಿನ್ನೆಯಿಂದ ಆರಂಭವಾಗಿದೆ. ಟೂರ್ನಿಯ ಆರಂಭಕ್ಕೂ ಮುನ್ನ ಸೆಂಟರ್ ಆಫ್ ಅಟ್ರಾಕ್ಷನ್ ಅನಿಸಿಕೊಂಡಿದ್ದ ಸ್ಟಾರ್ಗಳೆಲ್ಲಾ ಮಕಾಡೆ ಮಲಗಿದ್ರೆ, ಯಂಗ್ಸ್ಟರ್ಗಳ ಆರ್ಭಟಿಸಿದ್ದಾರೆ.
ಆರಂಭದಲ್ಲಿ ‘ಎ’ ತಂಡದ ಬೌಲರ್ಗಳ ದರ್ಬಾರ್.!
ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆಯುತ್ತಿರುವ ಇಂಡಿಯಾ ಬಿ ವಿರುದ್ಧದ ಪಂದ್ಯದಲ್ಲಿ ಟಾಸ್ ಗೆದ್ದ ಇಂಡಿಯಾ ಎ ಕ್ಯಾಪ್ಟನ್ ಶುಭ್ಮನ್ ಗಿಲ್ ಬೌಲಿಂಗ್ ಆಯ್ದು ಕೊಂಡ್ರು. ಮೊದಲು ಬ್ಯಾಟಿಂಗ್ಗಿಳಿದ ಇಂಡಿಯಾ ಬಿ ತಂಡ ಬೌಲರ್ಗಳ ದಾಳಿಗೆ ನಲುಗಿತು. ತಂಡದ ಸ್ಟಾರ್ ಬ್ಯಾಟರ್ಗಳಾದ ಯಶಸ್ವಿ ಜೈಸ್ವಾಲ್, ಸರ್ಫರಾಜ್ ಖಾನ್, ರಿಷಭ್ ಪಂತ್ ನಿರಾಸೆ ಮೂಡಿಸಿದ್ರು. 94 ರನ್ಗಳಿಸುವಷ್ಟರಲ್ಲೇ ಬಿ ತಂಡದ 7 ಬ್ಯಾಟ್ಸ್ಮನ್ಗಳು ಪೆವಿಲಿಯನ್ ಸೇರಿದ್ರು.
ಮುಷೀರ್ ಖಾನ್ ಶತಕ ವೈಭವ
ತಂಡ ಸಂಕಷ್ಟಕ್ಕೆ ಸಿಲುಕಿದ್ದ ಸಂದರ್ಭದಲ್ಲಿ ಕಣಕ್ಕಿಳಿದ ಮುಷೀರ್ ಖಾನ್ ಸಾಲಿಡ್ ಇನ್ನಿಂಗ್ಸ್ ಕಟ್ಟಿದ್ರು. 8ನೇ ವಿಕೆಟ್ಗೆ ನವ್ದೀಪ್ ಸೈನಿ ಜೊತೆಗೆ ಅಜೇಯ 108 ರನ್ಗಳ ಜೊತೆಯಾಟವಾಡಿದ್ರು. ತಾಳ್ಮೆಯಿಂದ ಇನ್ನಿಂಗ್ಸ್ ಕಟ್ಟಿದ್ದ ಮುಷೀರ್ ಖಾನ್ ಮನಮೋಹಕ ಸೆಂಚುರಿ ಸಿಡಿಸಿದ್ರು. ಮುಷೀರ್ ಖಾನ್ ಸೆಂಚುರಿ ನೆರವಿನೊಂದಿಗೆ ಇಂಡಿಯಾ ಬಿ ತಂಡ ಮೊದಲ ದಿನದ ಅಂತ್ಯಕ್ಕೆ 7 ವಿಕೆಟ್ ನಷ್ಟಕ್ಕೆ 202 ರನ್ ಕಲೆ ಹಾಕಿದೆ. 105 ರನ್ಗಳೊಂದಿಗೆ ಮುಷೀರ್ ಖಾನ್, 29 ರನ್ಗಳೊಂದಿಗೆ ನವ್ದೀಪ್ ಸೈನಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.
ಅನಂತಪುರಂನಲ್ಲಿ ಬೌಲರ್ಗಳ ಬೊಂಬಾಟ್ ಆಟ
ಅನಂತಪುರಂನಲ್ಲಿ ನಡೆಯುತ್ತಿರೋ ಮತ್ತೊಂದು ಪಂದ್ಯದಲ್ಲಿ ಬೌಲರ್ಗಳು ದರ್ಬಾರ್ ನಡೆಸಿದ್ದಾರೆ. ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಇಂಡಿಯಾ ಡಿ ತಂಡ, ಇಂಡಿಯಾ ಸಿ ಬೌಲರ್ಗಳ ಆರ್ಭಟದ ಎದುರು ನಲುಗಿತು. ಟಾಪ್ ಆರ್ಡರ್ ಬ್ಯಾಟರ್ಗಳೆಲ್ಲಾ ಬ್ಯಾಕ್ ಟು ಬ್ಯಾಕ್ ಪೆವಿಲಿಯನ್ ಸೇರಿದ್ರು. 76 ರನ್ಗಳಿಸುಷ್ಟರಲ್ಲೇ 8 ವಿಕೆಟ್ಗಳು ಉರುಳಿದ್ವು.
ನಿರಾಸೆ ಮೂಡಿಸಿದ ಶ್ರೇಯಸ್ ಅಯ್ಯರ್, ಪಡಿಕ್ಕಲ್
ಕುಸಿಯುತ್ತಿದ್ದ ತಂಡಕ್ಕೆ ಸ್ಟಾರ್ಗಳಾದ ಶ್ರೇಯಸ್ ಅಯ್ಯರ್, ದೇವದತ್ತ್ ಪಡಿಕ್ಕಲ್ ಕೂಡ ಆಸರೆಯಾಗಲಿಲ್ಲ. ಫ್ಲಾಪ್ ಶೋ ನೀಡಿ ನಿರ್ಗಮಿಸಿದ್ರು. ಇಂಡಿಯಾ ಸಿ ಪರ ಆಡ್ತಿರೋ ಕನ್ನಡಿಗ ವೈಶಾಕ್ ವಿಜಯ್ ಕುಮಾರ್ ಬೊಂಬಾಟ್ ಪ್ರದರ್ಶನ ನೀಡಿದ್ರು. ಸಾಲಿಡ್ ಸ್ಪೆಲ್ ಹಾಕಿದ ವೈಶಾಕ್, ಶ್ರೇಯಸ್, ಪಡಿಕ್ಕಲ್ಗೆ ಗೇಟ್ಪಾಸ್ ನೀಡಿದ್ರು. ಪಡಿಕಲ್ ಸೊನ್ನೆ ಸುತ್ತಿದ್ದಾರೆ. ಇನ್ನೇನು ಕೆಲವೇ ತಿಂಗಳಲ್ಲಿ ಐಪಿಎಲ್ ಹಂಗಾಮ ಶುರುವಾಗಲಿದೆ. ಅದಕ್ಕೂ ಮೊದಲು ಮೆಗಾ ಆಕ್ಷನ್ ನಡೆಯಲಿದೆ. ಈ ವೇಳೆ ಪಡಿಕ್ಕಲ್ ಅವರನ್ನು ಆರ್ಸಿಬಿ ಖರೀದಿ ಮಾಡಬೇಕು ಅನ್ನೋದು ಅಭಿಮಾನಿಗಳ ಒತ್ತಾಯ. ಆದರೆ ಪಡಿಕ್ಕಲ್ ಹೀಗೆ ಆಡಿದರೆ ಅವರನ್ನು ಆರ್ಸಿಬಿ ಖರೀದಿಸಲು ಪ್ಲಾನ್ ಮಾಡಲ್ಲ ಅಂತಾ ಅಭಿಮಾನಿಗಳು ಬೇಸರ ಹೊರ ಹಾಕಿದ್ದಾರೆ.
ಅಕ್ಷರ್ ಪಟೇಲ್ ದಿಟ್ಟ ಹೋರಾಟ ತಂಡಕ್ಕೆ ಚೇತರಿಕೆ.!
7ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಆಲ್ರೌಂಡರ್ ಅಕ್ಷರ್ ಪಟೇಲ್ ದಿಟ್ಟ ಹೋರಾಟ ನಡೆಸಿದ್ರು. ಬೌಲರ್ಗಳ ದಾಳಿಯನ್ನ ಸಮರ್ಥವಾಗಿ ಎದುರಿಸಿ 86 ರನ್ಗಳ ಕಾಣಿಕೆ ನೀಡಿದ್ರು. ಅಕ್ಷರ್ ಪಟೇಲ್ ಹೋರಾಟದ ಇನ್ನಿಂಗ್ಸ್ನ ನೆರವಿನಿಂದ ಇಂಡಿಯಾ ಡಿ ಅಂತಿಮವಾಗಿ 160 ರನ್ಗಳಿಸಿತು. ಬಳಿಕ ಮೊದಲ ಇನ್ನಿಂಗ್ಸ್ ಆರಂಭಿಸಿರುವ ಇಂಡಿಯಾ ಸಿ ಕೂಡ ಆಘಾತ ಎದುರಿಸಿದೆ. ಇನ್ನಿಂಗ್ಸ್ ಆರಂಭದಲ್ಲೇ ನಾಯಕ ಋತುರಾಜ್ ಗಾಯಕ್ವಾಡ್, ಸಾಯಿ ಸುದರ್ಶನ್ಗೆ ಹರ್ಷಿತ್ ರಾಣಾ ಪೆವಿಲಿಯನ್ ದಾರಿ ತೋರಿಸಿದ್ರು. ಆರ್ಯನ್ ಜುಯಾಲ್, ರಜತ್ ಪಟಿದಾರ್ ಅಕ್ಷರ್ ಪಟೇಲ್ಗೆ ಬಲಿಯಾದ್ರು. ಅಂತಿಮವಾಗಿ ಮೊದಲ ದಿನ ಅಂತ್ಯಕ್ಕೆ ಇಂಡಿಯಾ ಸಿ 2 ವಿಕೆಟ್ ನಷ್ಟಕ್ಕೆ 14 ರನ್ಗಳಿಸಿದ್ದು, 150 ರನ್ಗಳಿಂದ ಹಿನ್ನಡೆಯಲ್ಲಿದೆ.
