ಹೈದರಾಬಾದ್: ಪ್ರೀತಿ-ಪ್ರೇಮದ ವಿಚಾರ ಗೊತ್ತಾದ್ರೆ ಮನೆಯವರು ಮಕ್ಕಳನ್ನು ಪ್ರೇಮದ ಕೂಪದಿಂದ ಹೊರತರಲು ಪ್ರಯತ್ನಿಸುತ್ತಾರೆ. ಇದೇ ರೀತಿ ತನ್ನ ಮಗಳ ಪ್ರೇಮದ ವಿಚಾರ ತಿಳಿದ ತಂದೆ ಆ ಸಂಬಂಧ ಮುರಿಯಲು ಮಗಳನ್ನು ಅಮೆರಿಕಕ್ಕೆ ಕಳುಹಿಸಿದ್ದು, ಇದರಿಂದ ಕೋಪಗೊಂಡ ಪಾಗಲ್‌ ಪ್ರೇಮಿ ತನ್ನ ಪ್ರೇಯಸಿಯ ತಂದೆಯ ಮೇಲೆ ಗುಂಡು ಹಾರಿಸಿದ ಘಟನೆ ತೆಲಂಗಾಣದಲ್ಲಿ ಭಾನುವಾರ ನಡೆದಿದೆ. ರಾಚಕೊಂಡ ಕಮಿಷನರೇಟ್‌ನ ಸರೂರ್‌ನಗರ ಪೊಲೀಸ್ ಠಾಣೆ ವ್ಯಾಪ್ತಿಯ ವೆಂಕಟೇಶ್ವರ ಕಾಲೋನಿಯಲ್ಲಿ ಘಟನೆ ನಡೆದಿದೆ. ಆರೋಪಿಯನ್ನು ಬಂಧಿಸಲಾಗಿದೆ. ಈ ಸುದ್ದಿ ಇದೀಗ ಸಖತ್‌ ವೈರಲ್ ಆಗುತ್ತಿದೆ.
ವಾಗ್ವಾದದ ಬಳಿಕ ಕೋಪಗೊಂಡ ಆರೋಪಿ ಬಲ್ವಿಂದರ್ ಸಿಂಗ್ (25) ಏರ್‌ಗನ್‌ನಿಂದ ಹಾರಿಸಿದ ಗುಂಡು 57 ವರ್ಷದ ರೇವಂತ್ ಆನಂದ್ ಅವರ ಕಣ್ಣಿನ ಒಳಗೆ ಹೊಕ್ಕಿದೆ. ರೇವಂತ್ ಆನಂದ್ ಅವರ ಮಗಳ ಸಹಪಾಠಿಯಾಗಿರುವ ಬಲ್ವಿಂದರ್, ತನ್ನನ್ನು ಆಕೆಯಿಂದ ದೂರ ಮಾಡುವ ಸಲುವಾಗಿ ಮಗಳನ್ನು ವಿದೇಶಕ್ಕೆ ಕಳುಹಿಸಿದ್ದಕ್ಕಾಗಿ ಆಕ್ರೋಶಗೊಂಡಿದ್ದ ಎನ್ನಲಾಗಿದೆ. ರೇವಂತ್ ಆನಂದ್ ಅವರ 23 ವರ್ಷದ ಮಗಳ ಜತೆ ಬಲ್ವಿಂದರ್ ಸಿಂಗ್‌ಗೆ ಕಳೆದ ಕೆಲವು ವರ್ಷಗಳಿಂದ ಗೆಳೆತನವಿತ್ತು. ಇದರ ಬಗ್ಗೆ ತಿಳಿದ ಆನಂದ್ ಅವರಲ್ಲಿ ಅಸಮಾಧಾನ ಉಂಟಾಗಿತ್ತು. ಬಲ್ವಿಂದರ್‌ನನ್ನು ಭೇಟಿ ಮಾಡದಂತೆ ಅವರು ಮಗಳಿಗೆ ತಾಕೀತು ಮಾಡಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಹಾಗೆಯೇ ಬಲ್ವಿಂದರ್ ಸಿಂಗ್‌ಗೆ ಕೂಡ ಎಚ್ಚರಿಕೆ ನೀಡಿದ್ದ ಆನಂದ್, ತನ್ನ ಮಗಳ ತಂಟೆಗೆ ಬಾರದಂತೆ ಹಾಗೂ ಸ್ನೇಹ ಮುಂದುವರಿಸದಂತೆ ಸೂಚಿಸಿದ್ದರು. ಆದರೆ, ಅವರ ಮಾತಿಗೆ ಕಿವಿಗೊಡದ ಯುವ ಪ್ರೇಮಿಗಳು ಕದ್ದು ಮುಚ್ಚಿ ಭೇಟಿ ಮಾಡುವುದನ್ನು ಮುಂದುವರಿಸಿದ್ದರು. ಜತೆಗೆ ಫೋನ್‌ನಲ್ಲಿ ಗಂಟೆಗಟ್ಟಲೆ ಹರಟುತ್ತಿದ್ದರು. ಇದರಿಂದ ಕಸಿವಿಸಿಗೊಂಡ ಆನಂದ್, ಹೀಗೆಯೇ ಮುಂದುವರಿದರೆ ಮಗಳು ಕೈತಪ್ಪುತ್ತಾಳೆ ಎಂದು ಆತಂಕದಿಂದ ಆಕೆಯನ್ನು ಅಮೆರಿಕಕ್ಕೆ ಕಳುಹಿಸಿದ್ದರು. ಇದರಿಂದ ಕ್ರುದ್ಧನಾದ ಬಲ್ವಿಂದರ್, ಆನಂದ್ ಅವರ ಮನೆಗೆ ಹೋಗಿ ಅವರ ಜತೆ ವಾಗ್ವಾದ ನಡೆಸಿದ್ದ. ಪರಿಸ್ಥಿತಿ ಬಿಗಡಾಯಿಸಿದಾಗ ಆತ ಆವೇಶಗೊಂಡು, ತಾನು ಕೊಂಡೊಯ್ದಿದ್ದ ಏರ್‌ಗನ್‌ನಿಂದ ಅವರ ಮೇಲೆ ಒಂದು ಸುತ್ತು ಗುಂಡು ಹಾರಿಸಿದ್ದಾನೆ. ಅಷ್ಟೇ ಅಲ್ಲದೆ ರೇವಂತ್ ಅವರ ಕಾರಿಗೂ ಹಾನಿ ಮಾಡಿ ಅಲ್ಲಿಂದ ಪರಾರಿಯಾಗಿದ್ದಾನೆ. ಈ ಎಲ್ಲಾ ದೃಶ್ಯಗಳು ಅಲ್ಲಿದ್ದ ಸಿಸಿ ಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಇದನ್ನು ಓದಿ: ಒಮ್ಮೆ ಚಾರ್ಜ್ ಮಾಡಿದ್ರೆ 175 km ಮೈಲೇಜ್ ಕೊಡುವ ಹೊಸ ಎಲೆಕ್ಟ್ರಿಕ್ ಬೈಕ್!
ಗುಂಡು ಆನಂದ್ ಅವರ ಒಂದು ಕಣ್ಣಿನ ಒಳಗೆ ಹೊಕ್ಕಿದ್ದರಿಂದ ಅವರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಮಾಹಿತಿ ತಿಳಿದ ಕೂಡಲೇ ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು, ಅವರನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ದಾಳಿ ನಡೆಸಿದ ಬಳಿಕ ಸ್ಥಳದಿಂದ ಪರಾರಿಯಾಗಿದ್ದ ಆರೋಪಿ ಬಲ್ವಿಂದರ್‌ನನ್ನು ಸೆರೆ ಹಿಡಿಯುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಮುಂದುವರಿಸಿದ್ದಾರೆ. ಪ್ರಸ್ತುತ ರೇವಂತ್ ಆನಂದ್ ಕಣ್ಣಿನ ಗಾಯಕ್ಕೆ ವೈದ್ಯಕೀಯ ಚಿಕಿತ್ಸೆಯನ್ನು ಪಡೆಯುತ್ತಿದ್ದಾರೆ.
